الخميس، ٢ سبتمبر ٢٠١٠

خاطره حول دعاء الإمام...


بدأ الإمام في الدعاء والناس خلفه في البكاء،
 قائلا مرددا: اللهم انصر المسلمييييين المحتلييين فى بقاع الأرض حسبنا الله ونعم الوكييييييل عليك بالظلمة والغاصبين، اللهم ارزقنا الصلاة في المسجد الأقصى، وكرر الدعاء بكلمات مشابهه ...
وفكرى منشغل لازلت أنتظر أن أسمع منه أهم من هذا كله...
تفتكروا دعاء الأمام افتقر لإيه؟؟؟

لا أعلم لماذا شعرت بالسلبية والإنسحاب فى طيّات هذا الدعاء
شعرت بالذل بعدم تحمل المسؤوليه
أنتظرت من الأمام أن يقول اللهم أجعلنا سببا فى نُصرة الإسلام، اللهم استخدمنا لتحرير الأقصى ولا تستبدلنا، اللهم حقق إيماننا، واجعلنا ننول شرف النصر

أثناء الدعاء تذكرت كلمة أستاذ عمرو خالد واحد واقف تحت شجرة تفاح ذابلة وبيدعى ربنا تنزل تفاح طازج!!!

فنحن نرفع أكفانا طالبين تحرير المسجد الأقصى من براثنة المغتصبين
دون أن نقدم أرواحنا وكل ما نملك لهذا النصر
نطلب شرف الصلاة فى المسجد الأقصى دون أن نشارك شعبه المحتل قليل مما يعاني
كالطفل الذى يريد نصيبه من (التورته) بعد انتهاء أمه من عناء إعدادها
كيف هذا يا أحفاد عمر بن الخطاب
فهل نحن أطفال أم أننا لسنا من سلالة الأبطال؟!!
ملحوظة: هذه مجرد خاطره خطرت على فكرى أثناء الدعاء لا تعني إطلاقا تدخولى في نية الأمام فأحسبه على خير ولا أُزكى على الله أحد:)

الأربعاء، ٤ أغسطس ٢٠١٠

فتحوا باب الجهاد!!!


كلما اشتدت أزمة فلسطين وخرجت الشعوب فى الشوارع تهتف وتصرخ فى وجه الطغيان معلنين بأعلى صوتهم يا حكام البلاد افتحوا باب الجهاد، كلما اشتعل قلبى ثورة وانشغل عقلي بلحظة الجهاد، وفي قمة ثورتى واشتعال الفكره والقضية في كل وجداني، سألتنى أختي سؤال بسيط قالت ياترى ألوف الناس اللى خرجت فى المظاهرات وبتطالب بفتح باب الجهاد، يا ترى كام واحد منهم هيثبت فعلا في لحظة الجد!!
 هزني السؤال جدااا فلم أتوقعه فكان بديهى بالنسبة لى أنه مادام اشتعل قلب المرء منا برغبة الجهاد فمؤكد أن ساعة الجد سينضم الجميع للصفوف ولكن سؤال أختي أضاء لي زاوية كانت غافلة عنى يا ترى من سيثبت
اسأل الله الثبات لي و للجميع
من كام يوم حضرت محاضرة عن استقبال شهر رمضان


تحدث المحاضر عن كيفية استقبال هذا الشهر المبارك وضرورة تزويد العبادة وتلاوة القرآن والذكر والقيام هذا قبل رمضان حتى إذا أقبل رمضان نكون قد استعدينا تماما...كلام جميل
وفي أثناء المحاضرة ذكر المحاضر موقف استشهادي على ضرورة الاهتمام بالقيام والقرآن كنوع من تشجيع الحضور
قال أن كتائب عز الدين القسام  لا تضم لصفوفها إلى من أتم حفظ القرآن الكريم، ليس هذا فقط بل وحافظ على قيام الليل لمدة عام!!!
كانت وقع هذه الكلمات عليّ أشد من وقع سؤال أختي وبدء حواري مع نفسي يدور وقلت لها مؤنبه وموبخه ماذا إذا فتحوا باب الجهاد وثبتى عليه مش هيقبلوكِ يا فلحة فى صفوف المجاهدين بيقولك سنة كاملة قيام وختم حفظ القرآن!!!
أنتِ فين منهم...
قطعت صديقتى هذا الحوار الشخصي بقرصة شديده فى كتفي، وقالت سامعة بيقول ايه لازم رمضان دا نعلي الهمة ونركز فى القرآن شويه، اتنهدت وقلتلها إن شاء الله ولا زلت أفكر ماذا لو فتحوا باب الجهاد؟؟؟


هل سأكون في الصفوف الأولى أم أنهم سيرفضوني لأن الشروط لم تكتمل بعد...
خرجت من المحاضرة والفكرة مسيطره عليّا تماما وتذكرت أن باب الجهاد لن يُغلق في وجة عبد لحوح.
 فلنبدأ بالجهاد الأصغر ونجاهد أنفسنا وشهواتنا وننتصر عليها بكل قوتنا ليمكننا الله من الجهاد الأكبر.
أقبل شهر الطاعات فحي على الجهاد...

الأحد، ١ أغسطس ٢٠١٠

افهم دورك وما تحفظش..! تعديل

حملة: أخرتها هعنس، أو هطلق، أو هتجوز طرطور!
تم تغيير اسم الحملة إلى افهم دورك وما تحفظش..!
قبل أى حاجة، لا احنا أعضاء جمعية حقوق المرأة ولا مشاركين فى منظمة مناصرة الرجل. احنا وبكل بساطة شباب بيفكر بعقله وييحس بقلبه، شاف حال الرجل والمرأة اللى بقوا عليه فقرر ياخد وقفه لإعادة تقييم الوضع، كنا فين وبقينا فين ورايحين على فين...ياترى الوضع الحالي مرضي للطرفين؟؟؟



قررنا نعمل حملتنا حملة مجنونة وعاقلة، خيالية وواقعية، عشوائية وذات هدف...كل اللى هنعمله فيها هنفكر بصوت عالي ونقول بأعلى صوت لكل شاب مستهتر ومقضيها قهوة ونت ممكن تسبقنى؟ وفى نفس الوقت هنقول بلسان كل بنت عفوا أنا أميرة...وهنرجع تانى ونقول للشباب يامن ستكون وطني...وأخيرااا هنتكلم عن عواصف القلب...وهيكون معانا مستشارين متخصصين هيشاركونا حملتنا مش بس كدا كمان هيشاركونا أحداثنا و الأول هيكون: اضراب لحد ما تسبقنى


والتانى: ضحكوا عليكي وشلتى الليلة...وأخيرااا انتظروااا مفاجآت الحملة...
حملة عملنها على الفيس بوك فى انتظار مشاركة الجميعhttp://www.facebook.com/group.php?gid=136462416391919#!/group.php?gid=136462416391919&v=info

السبت، ١٧ يوليو ٢٠١٠

دعبسات


نفسي أدعبس جوا نفسي واغسل كل شيء بداخلي
نفسي ادعبس عن حاجات حلوة كانت راسخة فيا من زمان، كنت حضناها بقلبي، كنت حفظاها في عقلي.
نفسي ادعبس عن حلمي اللى كنت بحلمه بإصرار وعن قراري اللى كنت باخده بإقتدار بعد اعتمادى على الجبار
نفسي ادعبس عالحنان نفسي ادعبس عالأمان نفسي آلاقي بحور إيمان.
نفسي ادعبس عالصفا نفسي ادعبس عالوفا نفسي آلاقي قلوب تساندني وقت الجفا
نفسي ادعبس عن طفولتي نفسي ادعبس عن براءتي
نفسي ادعبس عالسكون
نفسي ادعبس عالقناعة نفسي أكتّر في العبادة، نفسي ارجع تاني زي زمان
نفسي ادعبس عالبساطة نفسي ارجع طفلة ما تعرفش غير السعادة
نفسي ادعبس عابتسامتي اللى كانت طالعة من جوا قلبي
نفسي ادعبس عالحماس نفسي ادعبس عالاحساس نفسي آلاقي قلب مبنى بأساس
نفسي ادعبس عن مبادئ أصبحت متبعثرة هنا وهناك
نفسي آلاقي قلب صامد دون اهتزاز
نفسي ادعبس عن قلبي اللى كان عمران بالعطاء، نفسي ارجع احضنه من تاني بضلوعي
نفسي ادعبس عالإرادة اللى بيها كنت أقدر أعبر أى غارة
نفسي ادعبس عاليقين
نفسي ادعبس على طيبة أيام زمان طيبة صادقة مافيهاش مجاملة ولا حتى اصطناع
نفسي ادعبس عن نفسي جوا نفسي، نفسي آلاقيها لسه زي ما هيّا حرة وأبية لا غلبها شيطان ولا أسرتها دنيا
نفسي ادعبس عن نفسي جوا نفسي، نفسي ألاقيها صافية طاهرة زي ما خلقها ربي
نفسي ادعبس عالثقة نفسي ادعبس عالرضا
نفسي ادعبس عالإرادة، نفسي ادعبس عالعزيمة نفسي ادعبس عالطموح اللى بيه كنت طايرة في سماء النجاح
نفسي ادعبس عن غايتى اللى كانت محفورة في وجداني
نفسي ادعبس عالشجاعة، نفسي ادعبس عالحرية، نفسي آلاقي عزيمة حديدية مهما مر عليها الوقت مش ممكن تنام
نفسي ادعبس عالمهارة، نفسي ادعبس عالبراعة، نفسي ادعبس عالنجاح
نفسي ادعبس عالتفاؤل، نفسي ادعبس عالبشاشة، نفسي آلاقي الأمل اللى عمره مافارقني لحظة واللى بيه كنت بخرج من كل أزمة
نفسي ادعبس عالتشجيع، نفسي ادعبس عالإحتواء، نفسي ادعبس عن دعم النجاح نفسي آلاقينى من تاني
نفسي ادعبس عن عقل كان متفتح، عقل كان بيقيل أى آخر، عقل كان مايهموش المظاهر
نفسي ادعبس عالفضيلة نفسي ادعبس عالعزيمة نفسي آلاقينى زى ما كنت أيام الطفولة
نفسي ادعبس عن قلب مليان بحب الخير قلب فرحان لأى غير
نفسي ادعبس عني أنا نفسي آلاقي اللى راح مني هنا
نفسي ادعبس جوا نفسي واغسل كل شيء بداخلي

سلمى ساجدة للرحمان

الأحد، ١١ يوليو ٢٠١٠

اصرخ يا قلمي


اكره قلمي عندما يعاندني و يعصاني، اكره عندما يمتنع أن تحتضنه أصابعي، عندما يمتنع أن يجري على صفحات الورق، عندما يمتنع أن يصرخ بما يجول في الوجدان.
لماذا تعصاني وتعاندني؟
ألم تعاهدني أن تكون معي مرن أمين، ألم تعاهدني أن تصرخ في وجه المتطاولين، فلما التراجع و التهاون، لما انخفض صوتك وقلت همتك؟
هل نفذ مدادك أم آثرت الإنضمام إلى صفوف الصامتين؟
ولكن كيف تصمت و أنت قلمي المتين، كيف تصمت و أنت تراعي رب العالمين، كيف تصمت و قد أخذت العهد أن تصرخ!!!

اصرخ يا قلمي واكتب عن غصة في الصدر و مرارة في الحلق، من نفس انتهكت حرمت الله، من قلب ألف المنكر ولم يعد يغضب لله.
من عين اعتادت المنكر و لسان لم ينكره ووجه لم يمتعض لله.

اصرخ يا قلمي واكتب عن ضمير خدرته كثرة الذنوب فلم يعد يقوى على مواجهة النفس و بها أصبح السيد عبد!!

اصرخ يا رفيق الأيام في وجه كل الأنام وارفع صوتك ليسمعك النيام، وأنت تخبرهم عن الدماء الباردة التى أصبحت تسري في عروق الرجال، عن المروءة التى أصبحت شيء محال، عن ثوب الحياء الذي مُزِّق بتهاون الرجال.

اصرخ يا قلمي وارتعد عن أمة مغتصبة أصبح وجهها فى التراب، عن شباب امتنع أن يرد شرف أمته.

اصرخ يا قلمي و صوّب رصاص مدادك في رأس كل ديوس صافح المغتصِب.
اصرخ و اصرخ واصرخ
ولا تتوقف عن الصراخ عسى أن يفيق النيام
 يتبع إن أمكن...

الاثنين، ٢٨ يونيو ٢٠١٠

كيلو الفراولة بكام؟؟؟




الفراولة دى من أحلى أنواع الفاكهة مش عارفه ليه بحس أنها فاكهة مدلعه نفسها، بترتبط دايما فى ذهنى الفراولة بالدلع والجمال، حاجة كدا فرولاية،
 بس حديثا جدااا بقت الفراولة بيرتبط ذكرها قدامي بالجنة!!!
مش بس الجنة دى كمان جنة الفردوس...

لما كنت في سنة أول حصل قدامى موقف معتقدش أنى ممكن أنساه عمرى كله،
 كان ليّا واحده زملتى بسيطه جدااا جدااا، ماكنتش أعرف مدى بساطتها المادية غير بعد الموقف دا،
 جاءت فى مره الكليه ولقتها بتقولى وأنا جاية لقيت راجل واقف بعربية فراولة كان نفسي فيها قوى لدرجة أنى كنت عايزه أقوله أدينى واحده بس..



رديت بكل سلاسة طيب ماشترتيش ليه كيلو ولا نص كيلو قالت بابتسامة إلى الآن لم أنساها، كيلو الفراولة بكام يا سلمى وأنا معايش حتى تنمن واحده،
طبعا أحرجت من نفسي جدااا جدااا وبصيت لها بشيء من الأسى ما كنتش عارفه اتصرف ازاي؟
فى أقل من ثانية لقيتها بتقول بابتسامه يملئها اليقين، فى الجنة إن شاء الله هاكل منها لحد ما قول بس،
وبدأت تسرد شكل القصر بتاعها وجناين الفاكهة اللى هتحيط بيه وطبعا مانسيتش جنينة الفراولة...يقنها كان مش عادى كنت أول مره فى حياتى أتعلم أفكر بالرضا واليقين دا، سبحان الله كان اسمها صفية اسم على مسمى بجد
ربنا يرزقك يا صفية جناين فراولة فى الدنيا والآخره وتنعمى فى الفردوس الأعلى مع حبيبك المصطفى


جمعتنا الأيام فى سنة واحده فى الكليه علشان اتعلم منك الموقف دا يا صفية، علشان كل لما أشوف الفراولة أدعيلك بالجنة، ممكن ننسى الأشخاص بس مش ممكن أبدا ننسي المواقف اللى بتأثر فينا، أكيد هى مش فاكرانى دلوقتى بس أنا ماعرفتش أنساها...
يا ترى فى كتييير زى صفية عندهم اليقين دا، لما يبقى محتاج حاجة وما يعرفش يجبها لظرف أو لآخر يقول فى الجنة إن شاء الله، ولا بيغضب ويتذمر ويشكى الظروف.
اللهم أملء قلوبنا رضا وقناعة ويقين لا يتزحزح أبدا...

السبت، ٥ يونيو ٢٠١٠

ستار أكاديمي شباب آخر حاجة




برنامج ستار أكاديمى طبعا أشهر من النار على العلم، برنامج ليه شعبية كبيرة وجمهور مواظب عليه، أهم ما يميز البرنامج دا أنه بيضم خيرة شباب الوطن، بنات وشباب حاجة جميلة جدااا، والأجمل من دا كله أنهم بيكونوا من بلاد مختلفه برنامج بيقدر يجمعنا، وحده
وطنيه رااائعة بجد جسمي قشعر..


شايفين الوحدة والانسجام حاجة آخر جمال
كل شاب من دول عنده رساله وهدف فكل واحد منهم جاي علشان يمثل بلده ويرفع راسها ويشرفها ربنا يبارك في عمركم ياشبابنا
وياحرام لما بيخسر واحد منهم يقعد يعيط راجل أو بنت عياط بيشحتف قلبى معاه ويعتذر لبلده أنه ماقدرش يكمل في مشوار رفع راسها وبيكرر أعتذاره فعلا،
فى وسط هذه الدموع وكل هذا الأسى


تذكرت صوره لم تغب يوما عن بالي...



على ما تبكين يا أماااه...

خلونا في موضوعنا شباب استار أكاديمى بقى دول شباب آخر حاجة شباب محدد هدفة شباب وطني فاهم قضيته آخر حاجة (بس المره دي آخر حاجة بجد)...شايفين الفرحه فعنيهم والوطنيه بتنط منهم ازاي


شايفين رفع راس بلده ازاي حد فيكم قدر يرفع راس بلده كدا؟؟
-بس براحه على راس بلدك وأنت رافعها لتوقع تنكسر-
في عز اندماجي في مشاهدة صورة راس بلده وهى مرفوعة
 قفزت أمام عيناي هذه الصوره..

لبيك واجعل من جماجمنا لعزك سلما...

مش عارفه ليه كل شويه بخرج عن الموضوع... ركزي ياسلمى شويه
وطبعا بكل وطنيه بنتابع البرنامج وبنصوت للبطل اللى عليه مهمة رفع راس البلد.
ونعيييييط لما الفارس يخسر ويطلع من البرنامج....

حسبنا الله ونعم الوكيل، ايه اللى بيحصل فى بلادنا دا معقول الآية اتقلبت للدرجة دي..معقول السطحية اللى وصلنالها دى،- قبل لما أكمل أحب أعتذر وبشده على هذه المقارنه الجاحفه فتقليل من شأن هؤلاء الأبطال أن أقارنهم بهؤلاء الغافلين-

لهذه الدرجة أصبحت مهمة رفع رأس بلادنا من مهمة هؤلاء الشباب، الذين سيطر عليهم الشيطان ولجمهم بلجامه، لهذه الدرجة تتساقط دموعك أماه لخروج ابنك من هذا البرنامج المدمر، برنامج يستهدف صلب هذه الأمه وبكل سذاجة انسقنا خلفه بنية رفع راس بلدنا...
اترك الباقي لتعليقاتكم...