الأحد، 10 أكتوبر، 2010

حديث الساعة...بكام يا بديعه؟؟؟



تفتكروا ايه حديث الساعة دلوقتى؟؟؟
مسلسلات رمضان؟ لا طبعا رمضان خلص من شهر
طيب المنتخب و كأس الأمم الأفريقيه؟ كمان لأ دا مش وقتها
طيب العنوسه البطالة فيرس سي حوادث القطارات الفتنة الطائفيه؟؟ لالالالا ما تروحوش لبعيد
خلاص يبقى أكيد كادر المعلمين وتحويل الوكلاء إلى مدرسين من تاني؟؟ يا خبر هم هيرجعوا اللى اترقى وبقى وكيل مدرسة لمدرس من أول وجديد لالا يا شيخه قولى كلام يتصدق غير دا،
يا مسكينه هو أنتِ ماتعرفيش الموضوع دا؟ سمعت عنه بس ما صدقتش أنه هيتنفذ بجد، طيب خلينا في موضوعنا ايه حديث الساعة النهارده
أنتِ هتغلبينا ليه معاكِ يا سلمى ما تقولى وتخلصينا؟؟
مفيش مخلوق ولا أى مجلس ولا أى ستيتس على الفيس بوك يخلوا من التعبير عن الاستياء من ارتفاع سعر الطماطم الجنوني وطبعا باقى السلع الاستهلاكيه، مجنونه يا قوطه وهتجننينا معاكِ...فقررت أنا كمان أكتب وأبوح عما يجول في خاطرى عن مشاعر الاستياء والقلق على الطماطم صديقتي الصدوقه منذ الطفوله...عصير الطماطم دا كان عندى حاجة مقدسة


-ملحوظه دى صوره متفبركه لأن أكيد مش دى شكل الطماطم اللى بنجبها من سوق الخضار-
 وفى خضم هذه الزحمة وهذا الجدل المتواصل حول ارتفاع سعر الطماطم، وكالعادة عند اقتراب اى انتخابات تظهر زوبعه تلهى الشعب الغلبان عن قضية العصر وعن حقه الحقيقي فبدل من أن يطالب بحقه فى لقمة عيش هنيه ووظيفه محترمه ومسكن أمان وتعليم نافع سينحصر جل طموحاته على أمنيه قد يعتبرها صعبة التحقيق ألا وهى خفض سعر الطماطم ليصبح فى متناول الجميع...
فبدل من أن تكون قضية الساعة الانتخابات وكيفية اختيار المرشح أصبحت كيلو الطماطم بقى بكام يا بديعه!!!
شيء مؤسف، ولكن لما الأسف والأمر فى ايدينا؟؟
مسكينه أنتِ يا سلمى: ( الأمر فى ايدينا ازاى؟؟؟
طبعا فى ايدينا خُلقنا أحرار وسنموت أحرار -إلا إذا اخترنا لأنفسنا شيء آخر- وقبل أن نموت أحرار لا بد وأن نعيش أحرار، أن نصون نعمة الحرية
ولكن كيف؟؟

بكل بساطة لن يأتى التغيير ونحن نائمون على أسرة الراحة والدعة لابد من كفاح ولابد من السعى وراء الحقوق المسلوبه.
 ولا نعجز فكم سمعت من أشخاص سلبيه غير مباليه بان التغيير لن يأتى قبل 20 سنه على الأقل، لهم أقول بكل تأكيد نعم لن يأتى حتى بعد 20 سنه مادام أمثالكم أحياء...انظر إلى تركيا وماليزيا وايران ودبى وستجد الرد
نحن لا نحتاج أكثر من 5 أعوام يا صديقى من الكفاح والصدق،
 وإلى أن تأتى هذه الأعوام لا بد أن نتحرك نحوها، أن نشمر عن عزيمه حقيقية ورغبه صادقة فى التغيير...
هاقد اقتربت انتخابات مجلس الشعب
فمن منا أعلن عن حريته وآمن بآدميته وقرر بأن يذهب إلى صناديق الانتخابات مهما كانت النتيجة فنحن لن نسأل عن النتيجة ولكن بكل تأكيد سنُسأل عن السعي
لن أقول انتخب فلان أو علان ولا حتى الأخوان ولكن انتخب من رايت فيه التغيير من هو الأصلح من وجهة نظرك
ارجوك لا تترك صوتك يعبث به العابثون
صوتك أمانه أديه للأصلح
واللى مش هينتخب وهيكسل فلطفا يقطع لسانه بايده وما يفتحش بؤه بعد النهارده وما يتكلمش عن الفساد وكيلو الطماطم اللى وصل لـ14 جنيه
كل واحد بقى يخلى باله من لسانه، لأن احنا ودانا وجعتنا من كثرة الثرثرة المصطنعه

نلتقى في لجان الانتخابات إن شاء الله
فى انتظاركم...
سلمى ساجدة للرحمان

هناك 16 تعليقًا:

  1. السلام
    عليكم
    حفطكى
    الرحمن
    ان الله لا يغير ما بقوم
    حتى يغيروا
    ما بأنفسهم
    اكرمكى المولى
    ومن
    يسمع
    او يعى
    الكل ملهى
    فى النيجر
    وتونس
    والجرائر
    والطماطم
    وجمال
    ربنا يصلح احولنا

    ردحذف
  2. سلمي

    السلام عليكم

    ممكن اختلف معاكي المرة دى
    الشعب دة عاوز صدمة زى 67 بالظبط عشان يفوق بجد
    حرام انا نفسي اعرف حاجة نفسية البني ادم اللي يحط صور جمال مبارك بعد كل اللي بنشوفوا دة يبقي ازاى

    طيب بلاش دى اساسا الشعب دة تفتكري عاوز ينتخب
    طيب هو يعرف معني انتخابات
    طيب هو يعرف ايه عن السياسة
    طيب بلاش هو يعرف ان سبب الازمة في راس النظام
    طيب يعرف يعني ايه نظام حاكم


    بجد ياسلمي انا وصلت لدرجة اوصلتني اني لازم الشعب دة يثور ثورة حقيقة حتي علي طباعه المترسخة فيه

    الشعب دة عاوز يتربي علي الاخلاق
    وعدم النفاق والموالسة
    وعدم اتباع الحاكم

    يتربي ويتظبط في اخلاق الشارع البسيطة

    ماعذا الله اني اتهم الشعب المصري انوا اخلاقه بايظه عشان هو كدة
    لا
    بس الحكومة والنظام عموما هو اللي جابلنا الافات دى
    والحكاية منفلتة اساسا منه
    ربنا يستر

    معلش طولت عليكي
    بس يمكن التعليق دة بكتبه وانا في حالة غليان اساسا

    دمتي بخير دائما

    تحياتي

    ردحذف
  3. حبيبه قلبى

    الشعب الغلبان الطيب المكافح الصبور المهاود
    ما بيده حيله
    واغلب الناس ملهيه فى لقمه العيش تجيبها اذاى
    واغلب الناس مالهاش فى السياسه
    ولا تعرف تنتخب مين
    ومين الافضل
    ولو جه الشخص الل ح يغيير يضمن منين ان ده هو الافضل
    ما يمكن اللى تحسبه موسى يطلع فرعون
    ولو الكل وقف محلك سر بدون انتخاب
    حتلاقى غصبن عنهم اسمائهم مكتوبه من المنتخبين اللى ادلوا باصواتهم اذاى معرفش ... سذاجه كده
    ده مش تشجيع بعدم الذهاب للانتخاب بالعكس المفروض على كل شخص يصوت يمكن تكون المره دى انتخابات نزيهه

    ربنا موجود وقادر انه يرحمنا وينتشنلنا من الغلب والقرف

    ردحذف
  4. كان الله في عون الشعب المصري ^_^

    وكل شعوبنا العربيه ^_^

    تحياتي يا سلمى

    ردحذف
  5. سلمى
    مشكورة على الموضوع الرائع
    وفعلاً طالما هناك في هذا الشعب أمثال هؤلاء المثبطين ... فلن يأتي التغيير ولو بعد 200 سنه
    دمتي طيبه وبخير
    محمد البنا

    ردحذف
  6. محمود: وعليك السلام ورحمة الله وبركاته
    عندك حق الشعب دماغه في حاجات تانية خالص الا من رحم ربي...والتغيير عمره ما هيجي غلا لما نتغير احنا من جوه

    ردحذف
  7. هيثم: وعليك السلام ورحمة الله وبركاته
    يا فندم اختلف زى ما أنت عايز...معاك أن الشعب عايز صدمه بس مش زى 67 قدها مرتين تلاته...فى اعتقادى ان الوضع اللى بقينا عليه مسؤوليه حكومة ظالمه وشعب استسلم، اكيد مش حجه هنقابل بيها ربنا أن الحكومه كانت وكانت...الاسلام ماانتشرش بالريموت انتشر بناس ضحت بأرواحها بقائد أمين
    ربنا يسترها علينا

    ردحذف
  8. حبيبتى مرمر: كان زمان ممكن نقول شعب غلبان مش فايده حاجة يعملها جاهل ياعينى مش عارف...بس دلوقتى وسط هذا الانفتاح الغير عادى كل المعلومات متاحه ما بقتش حجه بقى انه يقول مش عارف،وزى ما انتِ بتقولى لو مارحش حيعلموا بصوته زى ما هما عايزين يبقى فى ايدى أنى امنع اى ظالم عبث بصوتى...الموضوع مش هيجي غير بتضحية حقيقيهابتداءا بالمال انتهاءا بالنفس
    والله أعلم

    ردحذف
  9. الغاردينا: اللهم آآآمين دعوااااتكم لينا:))

    ردحذف
  10. محمد البنا: مشكور أخي الفاضل
    فعلا ولا 200 سنه...بس هنحتاج نضاعف مجهدنا علشان نقلل عد المثبطين دول والله فى العون

    ردحذف
  11. عايزه اقولك اننا قد يوم نشتكى ونندد ونشجب وبعدين ننام وننسى عشان نصحى بنفكر فى حاجه تانيه خالص هى دى مصر يا عبله يوووووووووووووه قصدى يا بديعه

    ردحذف
  12. دهب، هههههه هى دى مصر يا بديعة، بس الجديد على عبله أن مصر اتولد فيها جيل يصر على التغيير وبإذن الله سيأتى عاجلا أو آجلا...سلمت يمناكِ على التعليق...واعتذر على التأخير فى الرد

    ردحذف
  13. فيشه بنت كبس: أهلا يا فندم بحضرتك فى المدونة اسمك حلو قوى فى فكره جامده نورتينى...ونعم بالله

    ردحذف
  14. هو فعلا كانت مأساة شعب بكل المقاييس قصة الطماطم دي

    بس من ضمن الحجات اللي أقول ليه بنمشي في اتجاه واحد

    ومش بنحاول ندور على بديل

    يعني لما الطماطم غليت مشفتش حد غيّر طريقة طبخه

    نزلت موضوع على حارة زعتر اسمه وجبات بدون طماطم لمحاربة الغلاء

    ومناقشات كتير مع صحباتي يا جماعة ليه لازم نطبخ بطماطم وليه لازم نسبك؟؟

    فتحت كذا موقع طبخ أجنبي وابتديت أدور على طرق أخرى لطهو المكرونة والخضار بدون تسبيك

    يا سلمى الناس حطت ايديها على خدها ونزلت ندب

    بدل ماتدور على حل

    زي بالضبط ما عاملين دلوقت مع الحكومة الحالية

    أنا حسيت يا سلمى إنه مخطط حكومي عشان يعرفوا رد فعلا الشعب المصري

    وكان كما توقعوا الندب وخلاص دون البحث عن حلول

    فكان طبيعي انهم يطمئنوا ويطمنوا الكبار

    خلاص اطمنوا يا جماعة، لو قعدتم تذلوا فيهم ألف عام آخر هيندبوا حظهم دون محاولة التغيير .

    ليكي وحشة يا عسل :)

    ردحذف
  15. هبة النيل حبيبتى دائما مبدعة فى تفكيرك وحلولك...بصراحة ما جاش على بالى افكر فى الطبخات اللى من غير طماطم، بس دا مغزا القول نفكر فى الحل مش الندب عليه...وحشتيييييييييييييينى جداااا
    دمتى مبدعة وخير معلمة : )

    ردحذف

شاركني خاطرتك...