السبت، ٢٦ ديسمبر ٢٠٠٩

حلم....مجد من تاني



زمان حلموا أجدادي
برفع اسم الأمة في العالي
حلموا أحلام واقعية مش بس كلام فاني
كانت أحلامهم مليئة بالصدق و الأماني
خططوا لحلمهم تخطيط مثالي
كانوا نموذج طيب للحب و التفاني
تعبوا و جدوا و سهروا الليالي
كان هدفهم قدام عينيهم واضح زى أللآلي
و لأجل وضوح هدفهم رفعوا اسم الأمة في العالي
قادوا العالم في العلم والأدب و الفن الإسلامي
حفروا على جدران التاريخ قصة نجاح مش عادي
قدموا للعالم مفاتيح العلوم بدون فخر أو تعالي
كان البشر كلهم بيتكلموا عن حاجة اسمها أمجاد العالم الإسلامي
دا كان زمن أجدادي
استلمت الأمة و مجدها في العالي
و بأيدي أصبح مجد الأمة شيء ماضي
بأيدي جعلت أمجاد الأمة ذكريات في دفتر النسيانِ
ضيعت اسم الأمة بالتفاخر بحجات مش من صنع الأيادي
كنت إنسان أناني
كانت أحلامي سراب في خيالي
يا خوفي لما يجووا عيالي يسألوني عن أمجادي
يا ترى يا عيالي هتقولوا إيه عني لأحفادي
و لا مش هتجيبوا سيرتي أصل سيرتي شيء عادي
زى أي شيء تاني
لسه الوقت قدامي
لازم أفوق من التسويف و الأماني
لازم أيدي تصنع أمجاد لأحفادي
زى ما فعلوا أجدادي
لازم أرفع اسم الأمة من تاني
طبيب، مهندس، مدرس، أو أي شيء تاني
لازم أحفر على جدران الحاضر قصة نجاح الأمة من تاني
و لسه الوقت قدامي لصنع مجد من تاني
ودا شيء مش اختياري
بأيدي أو بأيد غيري مجد الأمة راجع من تاني

سلمى ساجدة للرحمان
2-8-2009


هناك ١٥ تعليقًا:

  1. السلام عليكم
    اختى الكريمه سلمي
    جزاكم الله خيرا على الابيات الرائعه
    المسلمون بنوا حضاره رائعه وعلموا الدنيا العلوم وطوروها وصنعوا علوما اخرى لم يكن العالم يعرفها
    مثل الجبر الذى اخترعه الخوارزمى وحتى الان تعرف طريقته الخوارزميات الى الان

    للاسف يوجد من بيننا من لا يعرف عن تاريخنا الكثير بل وللاسف يوجد من لا يعجبه تاريخنا ويسخر منه او يتهجم عليه

    اجدادنا كما قلتى قدموا لنا الكثير لنفخر به ونزيد عليه
    ودورنا ان نعتز بتاريخنا ونمشي على دربه ونتطور

    اجدادنا فهموا الاسلام وعرفوا ان اعمار الارض مسئوليه فعمروا
    يارب نقتدي بهم ونصبح مثلهم نعلم الناس الحضاره
    اشكرك مره اخرى وربنا يوفقك ويكرمك ويسعدك

    ردحذف
  2. وعليكم السلام ورحمة الله وبركاته
    جزانا واياكم
    دى حقيقه فى كتير مش عارفين وحتى مش بيفتخروا بالتاريخ دا، بس فى رأى ان مش دى المشكله الكبيره، المشكله الفعليه طيب احنا عملنا ايه علشان نبنى حضاره؟؟؟
    جزاك الله خيرااا على المتابعه والتعليق المتميز
    اللهم آآآمين ولك بمثله أخى الكريم...

    ردحذف
  3. بإذن الله مش هاكون انسانه عاديه
    تحيا حياة عاديه وتموت كإنسانه عاديه كانت ف الدنيا وانتهى ذكرها
    سأحاول ان تكون لى بصمه حتى لو كانت بصمه صغيره ف مجال معين
    ف لو كل انسان ابدع ف جزء من مجاله حالنا الى ماذا سيصل ؟!
    والفرق بين اجدادنا انهم كانوا يعرفوا ماذا يريدون ويمضوا لتحقيقه بخطى واثقة
    كانوا يعتبروا انفسهم لبنه فى بناء دولتهم ولم يعرفوا الاتكاليه والكسل والسلبيه التى انتشرت ف عصرنا

    ردحذف
  4. السلام عليكم

    من حقنا نحلم زي اجدادنا

    ومن حقنا نحقق حلمنا

    بس ازاى نحلم ونحقق واحنا فى وسط ناس بالشكل ده

    متزعليش لو بجد اولياء امورنا يعنى حكومتنا فيها الخير

    كانت عملت لنا كرامة وقدرت شعبها

    عاوزين نبقي زي بقية الشعوب بحكومتنا

    لكن احنا اللى بنقدر نحترم انفسنا وسط المجتمعات الاخرى

    عاوزيين تغيير جزرى يا بشررررررررررررر

    على فكرة تعريفك عن نفسك مميز وممتاز

    تقبلى تحياتى

    ردحذف
  5. فعلا يا آيه احنا محتاجين شويه تركيز كل واحد فى مجاله، مزيد من الاتقان هيفرقوا معانا كتير جدااا، ربنا يوفقك ويحققلك أحلامك ويعينك على وضع بصمتك فى الحياه.

    ردحذف
  6. وعليكم السلام ورحمة الله وبركاته
    أولا: شرفنى مرور حضرتك وتعليقك...
    ثانيا: لو كل واحد فينا قعد حاطت ايده على خده مستنى التغيير الجزرى يحصل يبقى يلا السلامه، تغيير الحكومه ونظامها شئ مش بأدينا لكن اللى بأدينا بجد أننا نكون إيجابيين يعنى مثلا ساعت الانتخابات كل مصرى ينزل يقول رأيه أيا كان بس لازم يعبر، كل موظف أو رجل أعمال أو عامل يتقن عمله على أكمل وجه بعيدا عن نظريه على أد فلوسهم، ساعتها بس التغيير الحقيقى هيجى مع احترامى الشديد الحكومه لقيانا شعب ضعيف جبان من الآخر سلبى يبقى ليه بقى تتعب علشانا، الحياه مش وردى المشوار صعب بس التغيير علينا فيه جزء كبير...دى وجهة نظرى
    بشكر حضرتك مره تانيه وشرفنى رأى حضرتك

    ردحذف
  7. اختى سلمى
    جزاكم الله خيرا
    نعم يجب ان نتحرك لتوعيه الناس بحضارتنا وتاريخنا
    ونكمل المشوار الذى بدأه الاجداد
    لا ان نكتفى بالفخر
    مع العلم بان الفخر بتاريخنا اعتبره دافعا للتقدم
    وهذا فى مقابل من يحاول ايهامنا بان اجدادانا لم يتركوا شيئا وعلينا بذلك تقليد الغرب بل والتبعيه له
    ربنا يصلح الاحوال
    ربنا يوفقك ويبارك فيكي

    ردحذف
  8. ربنا يعينا ونقدر كلنا نكون سبب فى عودة مجد ضائع
    ياااااارب

    ردحذف
  9. يارب نقدر نعيد مجد امتنا الضائع
    عجبتنى الكلمات والمدونه ككل

    ردحذف
  10. السلام عليكم
    أعجبتني التدوينة

    تقبلي فائق احترامي لطرحك ..

    أدام الله لنا قلمك ولنا تواصل

    ردحذف
  11. mohamed ghalia: اللهم آآآآمين ربنا يستجيب منك، شكرااا عى مرورك ومتابعتك 

    ردحذف
  12. blue-wave: شرفت المدونه واسعدنى تعليقك، ربنا يعنا ويقوى عزائمنا 

    ردحذف
  13. أحمد شريف: وعليكم السلام ورحمة الله وبركاته
    شرفت المدونه وسرني كثيرااا تعليقك
    جزاك الله خيرااا

    ردحذف
  14. أول زيارة للمدونة بس بجد تحفة
    والبوست كمان هايل
    تسلم إيدك
    سعيد جدا بزيارتى لمدونتك

    ردحذف
  15. a7med-mado:زيارتك نورت المدونه وأسعدنى جدااا مرورك واتمنى تتابعها باستمرار، جزاك الله خيرااا أنا الأسعد..

    ردحذف

شاركني خاطرتك...