السبت، ١٣ فبراير ٢٠١٠

الناس دى هنا بتعمل ايه؟؟؟


  شاء القدر أنى أقرأ كتيب بعنوان القراءة منهج حياة للدكتور راغب السرجاني، كان بيتكلم فيه عن أهمية القراءة وأنها مش ممكن تكون هواية لأنه مش معقول أن الواحد يقول أنا هوايتى الأكل أو الشرب، يعنى القراءة شيء ضرورى تماما زى الأكل والشرب. وسأل سؤال هزني جدااا، ازاى أمة أقرأ لا تقرأ؟... بعد الكتيب دا ألزمت نفسي أنى انضم لعالم القُرّاء والحمد لله ربنا عانى جدااا وأصبحت جزء من حياتى صعب الاستغناء عنه، وبما أني ضيفة جديده على هذا العالم أخدت فترة لحد ما عرفت ازاى اقرأ وازى أختار الكتب. الأسبوع اللى فات روحت معرض الكتاب انتظرت اليوم دا بفارغ الصبر بس الرخم اللى فى الموضوع أنه كان يوم جمعة أول جمعة بعد امتحانات الأعدادية اتفاجأت بالمنظر دا...


-حاولت أن مايظهرش وجه حد لأنى لقطها بدون أذن- الزحمة كانت شديده جدااا والناس واقفه مثابرة على الباب علشان تقطع التذاكر كأنهم داخلين الماتش النهائي لكأس الأمم الأفريقية...اندهشت جدااا فأخذت اللقطة دي...


ودي كمان...


لاحظتوا الزحمة مش كدا؟؟؟
بجد كنت مستغربة جدااا قلت ماشاء الله معقول الأعداد دى كلها بتقرأ أمال ليه دكتور راغب عمل كتيب بيشتكى فيه من قلة القراية وعدم الاهتمام،
طبعا لأنى عضوة جديده فى هذا العالم دارت فى ذهنى تساؤلات كتير، وفى أثناء الحوار الشخصى دا وأثناء ماكنا واقفين مستنين التذاكر تيجى سمعت شخص من ورائي بيقول كلمة أضافت أستفهام جديد لمجموعة استفهاماتى،
قال: لوكل الناس دي كانت بتقرأ بجد كان زمانا قدنا العالم من زمان!!!!
أمال الناس دى هنا بتعمل ايه؟؟؟
فى اللحظة دى سمعت واحده من اللى فى الصورة السابقة بتقول أنا ايه اللى خلانى جيت معاكم أنا لاليّا فى القراية ولا بحبها مش كنت روحت اتفسحت فى حته تانية؟؟؟
وواحده تانية بتقول جبتى الأكل معاكِ والشاى والماية؟؟؟
عرفت ساعتها أن معرض الكتاب أصبح نزهة لبعض الأشخاص...
لما دخلت ولقيتهم فارشين ياكلوا على الأرض ويتمشوا فيه
قولت فعلا كان زمانا دلوقتى قادة العالم بلا منازع
لو كل الناس دي كانت بتقرأ بجد.....

هناك ٣٠ تعليقًا:

  1. على قد ما ضحكت من موضوعك
    على قد ما اتألمت

    فعلاً سؤال جدير بالملاحظة

    الناس دي كلها بتعمل ايه

    واذا كانوا كلهم بيقرأوا ، امال احنا مازلنا متخلفين ليه ؟!!

    فعلاً القراءة مفيدة ..
    وانا بخالف الرأي اللي بيحط ضوابط للقراءة ..
    بحيث إنك تقري حاجات معينة ، وحاجات تانية لأه ، خصوصاً لو الحاجات التانية دي كانت بتخالف القيم والتقاليد بتاعتنا

    في نظري ، القراءة الحرة المفتوحة
    بتثقل الإنسان برصيد كبير جداً من الخبرة

    وزي ما بيقولوا : مش هاتعرفي تميزي الغث من الثمين ،، إلا لو قرأتي في الاتنين ..

    ده غير إن العلم تراكمي ..
    ماينفعش أعتمد على تأملاتي الشخصية بدون قراءة ..
    ده ممكن يكون فيه نوع من الاستقلالية ، لكن لو كان هيفيدك في سنين ، القراءة ممكن تفيدك نفس الفايدة دي في شهور ..


    تقبلي مروري

    بَرَاء

    ردحذف
  2. أميره
    عند حق
    فعلاً لوكان كل هؤلاء الناس يقرأون لكنا أمام الامم وقادتها .
    ولكن للأسف الكثيرين يعتبرون معرض الكتاب نزهه وليست أكثر من هذا .
    ليتنا نقرأ
    تقبلي تحياتي
    محمد البنا
    طريق النجاح

    ردحذف
  3. السلام عليكم
    نسبة الأمية في مصر حوالي 30%، الأمية في اسراثيل 4%(معظمهم من العرب) و ال 70% اللي بيعرفو يقروا في مصر بيكتفو بقراءة كتب المدرسة بالعافية، أما اللي دخلوا الجامعة فهما بردوا كفاية عليهم الملخصات و الكتب الدراسية و بعد ما يخلصوا الجامعة بيبقي فيه بينهم و بين أي كتاب أو حتي الجرايد سوء تفاهم. حتي اللي ربنا بيفتح عليهم من الشباب و يحاولو يقرو الجرايد تلقيهم يقروا الجرايد الرياضية، و لو ماكنش الجرنان بتاع رياضة بيكتفوا بقراية صفحة الرياضة و بالذات كرة القدم و ممكن الحوادث في أي جرنان و بعد كده شكرا، كأن السيد يس و حازم الببلاوي و فهمي هويدي و سلامة أحمد سلامة و نبيل علي و........ بيكتبوا لناس في كواكب تانية.
    اسراثيل (5 مليون شخص) بتنتج 13 ألف عنوان كتاب جديد كل سنة، أكتر من اللي الدول العربية بتنتجه مجتمعة (250 مليون نفر).. مش هانتكلم عن أمريكا و لا فرنسا و لا حتي تركيا.
    بالمناسبة : الفسحة في المعرض كانت حلوة؟ :)
    حازم

    ردحذف
  4. براء: أسعدنى مرورك ونروت المدونة وأتمنى دوام المتابعة، أتفق مع جزء كبير من وجهة نظرك وبحترم الجزء الباقي، مش كل الناس عندها الوعى اللى يخليها تقرأ فى كل حاجة وتكون موضوعيه فى حكمها، شيء مفيد جدااا أننا نقرأ فى كل الموضوعات ولكل الناس بس فى ناس القراية ليهم مضيعة وقت اللى بيحاولوا يتشهروا باى شكل وباى فكر دول البعد عن القراءة لهم غنيمة من وجهة نظرى، شكرااا على مرورك العطر

    ردحذف
  5. السلام عليكم ورحمة الله وبركاته ..

    أولاً / جميل جداً أنك انضممتِ لمحبي القراءة ، ارتسمت على وجهي ابتسامة حين قرأت انك احببتي القراءة : )

    ثانياً / فعلاً ان شر البلية مايضحك !
    ادهشتني اعداد الزوار !!
    مؤلم للفؤاد ان هذه الاعداد الضخمة لاتقرأ جميعها .. ولو كانت تقرأ فعلاً لكانت أمتنا في حال أفضل مما هي عليه !
    الله المستعان ,,


    تقبلي مروري الاول لمدونتك ..
    راقت لي كثيراً : )

    دمتِ بسعـادة وتفاؤل أختي ~

    ردحذف
  6. محمد البنا: نورت المدونة، فعلا ليتنا نقرأ والأهم من دا ليت كل اللى ادرك أهمية القراءة يلتزم بيها، أمة أقرأ لازم تستشعر حجم المسؤولية، الله المستعان
    شكرااا على تعليقك الراقي

    ردحذف
  7. حازم: وعليك السلام ورحمة الله وبركاته
    جزاك الله خيرااا بس الاحصائيات دى بجد توجع القلب، بس أهم حاجة انك اتبسط بالفسحة;-)
    شكرااا على تعليقك المتميز

    ردحذف
  8. ألوان التفاؤل: وعليك السلام ورحمة الله وبركاته
    وارتسمت على وجهى أحلى ابتسامة بمرورك الراقى:)))
    اسعدنى مرورك كثيرااا أخيتي وامتلء قلبى تفاؤل من اسم مدونتك وشعرت براحة حقيقية فى ظلال مدونتك وتم تحميل الملف، جزاك الله خيرااا على المرور والتعليق الجميل واتمنى دوام المتابعة ربنا يجعلك متفائله دائما وأبدااا

    ردحذف
  9. أهلاً أميرة

    بشكرك أولاً على إضافتك لمدونتي عندك

    ثانياً ليا طلب صغير ، لو مفيهاش رخامة
    ازاي أحط الريدر بتاع المدونات اللي بتابعها ، عندي في مدونتي ؟

    مستني ردك

    ردحذف
  10. سبحان الله

    الموضوع طلع بسيط جداً

    بعد ما كتبت لك التعليق اللي فات
    اكتشفت إن الخاصية دي موجودة في بلوجر نفسه
    مش في موقع تاني زي الويدجيت

    معلش أزعجتك :)

    ردحذف
  11. اتفق معاكى فى كلامك

    مش كل الناس اللى بتروح معرض الكتاب مغرمة بالقراية

    نفسى بجد تكون القراية اول مادة تتدرس فى المدرسة

    ربنا يوفقك ويكرمك

    مع خالص تحياتى

    ردحذف
  12. السلام عليكم ورحمة الله وبركاته

    أصاب الدكتور راغب السرجانى فى سؤاله؟ وأصبتى يا دكتوره سلمى ؟؟ فعلا لماذا أمة اقرأ لا تقرأ؟؟؟

    كنت فى المواصلات فى ألمانيا فلفت نظرى شىء غريب... أن فى المترو شاشة تليفزيونية فى كل عربه تعرض اخبار واعلانات وغيرها ... ومعظم الناس فى العربه منتبه لهذه الشاشة غالبا ليطلع على الأخبار... أما معظم الباقين فيمسك كل منهم بكتاب يقرا فيه وكأنه سوف يدخل لجنة الامتحان بعد قليل... لذا كان لابد لهم أن يتقدموا وأن نكون نحن فى ذيل الأمم

    انتقلت الى كافيه وجلست مع أصحابى فاذا بى أجد رجل يحمل شنطة "هاندباك" يجلس على الترابيزه المجاوره وبمجرد جلوسه وبسرعه يفتح الشنطه ويخرج كتاب ويجلس يقرأ حتى يأتى طلبه ... ظننت أنه سيقرا خمس أو عشر دقائق ... فاذا بطلبه يأتى بعد دقيقه ... قلت فى نفسى سبحان الله ... دقيقه يستغلها فى القراءة . نفس المشهد والله شاهدته فى مطعم فى ميدان التحرير ولكن للأسف كان من شخص يبدوا من مظهره ولغته أنه ليس مصريا.. لذا كان لابد لهم أن يتقدموا وأن نكون نحن فى ذيل الأمم

    اقرأ باسم ربك الذى خلق

    مع خالص تحياتى

    ردحذف
  13. براء: أهلا بيك، عفوا مش محتاجة شكر، أبدا ما أزعجتنيش ولا حاجة الحمد لله أنك عرفتها. نورتينى

    ردحذف
  14. سيدى الفاضل تامر نبيل: فكرة رائعة لو اتنفذت بجد هتفرق كتير بس لما أسلوب التعليم أصلا يتغير، لأننا فعلا كنا بندرس مادة القراءة وفيها جزء خاص للمطالعة بس هيهات أعتقد أنها السبب الحقيقى وراء أن الأغلبية بتكره القراءة!!!
    شكرااا جزيلا على المرور والتعليق مدونات حضرتك كلها متميزه بس حدائق الموت مرعبه قوى:)))

    ردحذف
  15. دكتور أبومهرة: وعليك السلام ورحمة الله وبركاته
    أولا حمد لله على السلامة،
    ثانيا: شعرت بحزن وألم من الكلام دا كل اللى ينقصنا العزيمة ومن ثم التنفيذ مش كل حاجة على الحكومة فى حاجات كتير علينا برده يعنى حاجة زى القراية احنا اللى مكسلين...فعلا مشهد يدمى القلب وبكل صدق البلاد دى تستحق أنها تقود العالم، الله المستعان

    ردحذف
  16. اولا يا سلمى بغض النظر عن ان الرحله نجحت او اتقر عليها ههههههه انا عجبنى موضوعك جدا بس انتى بتتعجبى مش حاجه مفروغ منها الناس دلوقتى مش فاضيه للقرايه فاضين لحاجات تانيه اهيف بكتييير ....ربنا يهدينا واياهم

    ردحذف
  17. مارو حبيبة قلبى جيتى لقضاكِ برجليكِ كنت بحاول أنسى سحركم الرهيب واتماسك ربنا يسامحكم...بس عندك حق الناس مش فاضية للقراية من كتر السطحية والهيافة اللى ملت دماغهم ربنا يتولانا برحمته التى وسعت كل شيء...

    ردحذف
  18. ليه ياسلومتى دخلتى عالم القراءه متاخر كده
    مع انى صحبتك بس انا سبقتك من زمان وخاصه من سنتين لما اشتغلت فى المدرسه طول النهار استعير من المكتبه
    الحمد لله يعتبر باقى لى كام عدد واخلص المكتبه الخضراء وقطعت شوط كبير جدا فى فلاش وميكى والمغامرون الخمسه
    والله اكبر عليا خلصت كل ملف المستقبل ورجل المستحيل
    انا بقول لكى الكلام ده علشان تتشجعى مش علشان تحبطى وتقولى الهام سبقتنى بمراحل
    مع الاستمرار هتوصلى وممكن تحصلينى
    بس بجد اتكسفت اوى اوى من حلقه احمد الشقيرى لما كان فى اليابان انا متهيقلى بيقراءو وهما فى الحمام

    http://www.youtube.com/watch?v=O_Z7lNd9oCU

    الهام

    ردحذف
  19. ميس لولو: بجد ياالهام أنا زعلانة سبقتينى من غير ما تاخدي بأيد صحبتك ينفع كدااا!!! هلحق أقرأ كل دا امتى بقى؟؟؟ هى دى الصداقة؟هههههههههههه
    الشعوب دى يجب أن ترفع لهم القبعة، بحلم باليوم اللى نكون زيهم أحنا نقدر نكون نصهم لما نغير عقولنا وطريقة حياتنا وهنبقى أحسن منهم لما اللى بالى بالك يتغيروا...

    ردحذف
  20. ملاحظة فى محلها تماما ، ربنا يكرمك

    فعلا كثير بيروحوا المعرض كفسحة مش علشان يقرؤا ، بس الواحد بيكون عنده أمل إنه يمكن واحد منهم كتاب يلقت نظره مثلا فيشتريه و من كتر ما بيشوف الكتب يحصل له عدوى القراءة

    د.طارق السويدان كان بيقول إن الحد الأدنى من الثقافة هو قرائة كتابين فى الشهر ، و الكتاب يكون 200 صفحة من الحجم المتوسط، يعنى 400 صفحة فى الشهر

    يعنى لما كل واحد قرأ فقط 15 صفحة كل يوم ، يبقى كويس جدا ، و يبقى عمل 450 صفحة كمان مش 400

    و ربنا يعيننا جميعا على أن نقرأ أكثر من كده مما ينفعنا

    أختى الكريمة سلمى، إذا أمكن ، فأتمنى فقط أن تتغير الكلمة فى آخر جملة إلى قادة العالم

    ربنا يوفقك دائما لكل كل خير

    خالص تحياتى لك

    ردحذف
  21. الأميرة سلمى

    كنت أتمنى فعلا أن يكون كل هؤلاء الناس للقراءة هنا

    لن أتحدث عن نسبة الأمية

    فهذه هي نسبة من لا يقرأ "كتب الوزارة"

    لكن كم من "الأميين" من خريجي جامعاتنا

    وكم من الأميين يحملون رسائل الدكتوراه

    الأمي من لا يقرأ الناس بصدق

    ولا يستطيع حتى قراءة نفسه والمحيط

    ولا يدرك معنى الحياة...

    الأميرة سلمى

    لولا القراءة عليّ لكنت الآن من عداد الموتى أو المجانين

    سلمكِ الله من كل سوء

    ردحذف
  22. السلام عليكم ورحمة الله وبركاته
    أحسنت الطرح والعرض يااميرتنا،أراك قد دخلتى قلوب كل الناس بأسلوبك البسيط وصدق تعبيرك .
    سلمت يداك وسلم قلمك يادكتورة سلمى.
    وأنتظر بتلهف موضوعك الجديد.

    ردحذف
  23. د/ الله يعزك جزاك الله خيرااا، ربا يعينا جميعا على القراءة والعمل بما نقرأ...تمت الملاحظة والتنفيذ يا فندم شكرااا جزيلاااا، دمتى بحب وسلام

    ردحذف
  24. هبة النيل: صديقتى الحبيبة عجبتنى جدااا ربط الأمية بعدم القدرة على قراءة النفس، لو نفسي مش واضحة بالنسبة بالى يبقى لاقية لوضوح أى شيء آخر، وأنا كمان بعترف بفضل القراءة وأثرها الكبير عليّا..الحمد لله والله المستعان.

    ردحذف
  25. رشااااا القاضى بجد أدخلتى على قلبي السرور وعلى مدونتى النور، شرفتينى وأسعدتينى جدااا يارشا ويارب التواصل بينا يدوم إلى أن أراكِ على خير، جزاكِ الله خيرااا

    ردحذف
  26. دكتورتنا الفاضلة
    اعزكي الله وحفظكي
    كنت زائرا دائما للمعرض الا ان هذه للأسف هي السنة الثانية التي لم احضره لظروف العمل والكسل :)
    لكنني كنت حريص علي حضور الندوات والتجول فيه جنباته وكنت اشاهد كثير من الناس يأتون بحثا عن كتب ومراجع وتكونت لي صداقات مع عدد من الزوار من كثرة مشاهدتهم سنويا
    حتي الموظفين الاستاذ حسن والاستاذة نادية المسؤلين عن تنظيم الندوات اصبحوا يعرفوني
    كنت دائما التقي الكتاب والمفكرين واتواصل معهم في الندوات وآخذ ارقام هواتفهم
    هذه تجربتي التي شهدت فيها اهتمام الناس بالكتب والثقافة
    ولكن هنا نضع نقطة ونكتب من اول السطر .
    مشكلتنا في تحويل الكلام لأفعال
    محتاجين نشر الثقافة
    لي عودة بموضوع حول هذا المعني ان شاء الله
    ومتأسف للاطالة

    ردحذف
  27. د/أحمد لاشين ماشاء الله شيء عظيم، طبعا القاعدة مش عامة انا بنقل مشهد وتساؤل شخص كان واقف لو كل الناس اللى كانت موجوده كانت بتقرأ بجد زى حضريتك وزى ناس كتيرة تانية كان زمنا قدنا العالم، وبتعليق حضرتك كدا الصورة اكتملت لنماذج الواردين على معرض الكتاب...جزاك الله خيرااا

    ردحذف
  28. ههههههههههه

    حلووووووووة

    ومش حتى دا بس في ناس كثير برضو تشتري

    عشان تجمعهم في البيت وبس !

    عشان يكون معاهم مكتبه جميله يفتخروا فيها

    بس لو فتحتي المكتبة تلاقي العناكب بتشتغل من سنين

    هههههه وفي ناس بتقرأ صح بس برضو مش بتستفيد شئ

    لانها ما بطبق شئ بحياته !

    أعذب تحية وسعيدة جداااااا بزيارتي لك

    اضفت نفسي عندك عشان اتابعك ^_^

    ردحذف
  29. الغاردينيا: نورتينى وأسعدتينى عندك حق فى ناس كتير بتعتمد على المكتبة فى أنها أحد أهم الأنتيكات اللى لازم تكون فى البيت، والأصعب من كدا النوذج التالت اللى ذكرتيه وهو الناس اللى بتقرأ ومش بتطبق اللى قريته..ربنا يعينا جميعا
    أسعدني تواجدك كثيرااا وفى انتظار مشاركاتك دائما ونورتى المدونة

    ردحذف
  30. Wynn Las Vegas, NV Jobs - JMT Hub
    JAMMY LAS 김천 출장마사지 VEGAS, 부산광역 출장샵 NV - JULY 10: Wynn Las Vegas announced 세종특별자치 출장안마 today that 밀양 출장마사지 it has entered into an agreement to 안산 출장샵 expand its Las Vegas properties.

    ردحذف

شاركني خاطرتك...