الاثنين، ٢٨ يونيو ٢٠١٠

كيلو الفراولة بكام؟؟؟




الفراولة دى من أحلى أنواع الفاكهة مش عارفه ليه بحس أنها فاكهة مدلعه نفسها، بترتبط دايما فى ذهنى الفراولة بالدلع والجمال، حاجة كدا فرولاية،
 بس حديثا جدااا بقت الفراولة بيرتبط ذكرها قدامي بالجنة!!!
مش بس الجنة دى كمان جنة الفردوس...

لما كنت في سنة أول حصل قدامى موقف معتقدش أنى ممكن أنساه عمرى كله،
 كان ليّا واحده زملتى بسيطه جدااا جدااا، ماكنتش أعرف مدى بساطتها المادية غير بعد الموقف دا،
 جاءت فى مره الكليه ولقتها بتقولى وأنا جاية لقيت راجل واقف بعربية فراولة كان نفسي فيها قوى لدرجة أنى كنت عايزه أقوله أدينى واحده بس..



رديت بكل سلاسة طيب ماشترتيش ليه كيلو ولا نص كيلو قالت بابتسامة إلى الآن لم أنساها، كيلو الفراولة بكام يا سلمى وأنا معايش حتى تنمن واحده،
طبعا أحرجت من نفسي جدااا جدااا وبصيت لها بشيء من الأسى ما كنتش عارفه اتصرف ازاي؟
فى أقل من ثانية لقيتها بتقول بابتسامه يملئها اليقين، فى الجنة إن شاء الله هاكل منها لحد ما قول بس،
وبدأت تسرد شكل القصر بتاعها وجناين الفاكهة اللى هتحيط بيه وطبعا مانسيتش جنينة الفراولة...يقنها كان مش عادى كنت أول مره فى حياتى أتعلم أفكر بالرضا واليقين دا، سبحان الله كان اسمها صفية اسم على مسمى بجد
ربنا يرزقك يا صفية جناين فراولة فى الدنيا والآخره وتنعمى فى الفردوس الأعلى مع حبيبك المصطفى


جمعتنا الأيام فى سنة واحده فى الكليه علشان اتعلم منك الموقف دا يا صفية، علشان كل لما أشوف الفراولة أدعيلك بالجنة، ممكن ننسى الأشخاص بس مش ممكن أبدا ننسي المواقف اللى بتأثر فينا، أكيد هى مش فاكرانى دلوقتى بس أنا ماعرفتش أنساها...
يا ترى فى كتييير زى صفية عندهم اليقين دا، لما يبقى محتاج حاجة وما يعرفش يجبها لظرف أو لآخر يقول فى الجنة إن شاء الله، ولا بيغضب ويتذمر ويشكى الظروف.
اللهم أملء قلوبنا رضا وقناعة ويقين لا يتزحزح أبدا...

هناك ١٧ تعليقًا:

  1. سلمى..
    بجد الللللله عليك وعلى بوستاتك الهادفة..
    انت كمان بتتعلمي عشان تعلمينا..

    بجد البنت دي نقية قوي وربنا يرزقها من حيث لا تحتسب..
    واجمل نعمة في الدنيا فعلا (الرضا)..
    بوست شديد الحلاوة بجد والله وكأني تذوقت فراولة الجنة بين السطور..
    ربنا يرزقك ويرزقنا نعيم الجنه .
    تحياتي لفكرك يا سلمى.

    ردحذف
  2. صباح الفل يا سلمى
    لالا فل ايه صباح الفراوله
    انا بمموت فيها بجد بحب اكلها قوى وبخزنها كمان
    جميله حياه الرضا
    يارب يكون عندنا كلنا رضا باللى ربنا بيدهولنا وقاسمه لينا
    ربنا يفرح قلبك ويكون معاكى

    ردحذف
  3. اللهم آآآآآآآآآآآآآآآآآآآآمين، جزاك الله خيرااا
    ربنا ينعم علينا جميعا بالفردوس الأعلى، مشكور على التعليق الجميل.

    ردحذف
  4. مرمر، صباح جنينة فراولة يا ستى مادام بتحبيها كدا:))
    اللهم آآآآمين ربنا ينعم علينا جميعا بالرضا،جميييييله قوى دعوتك ليّا ولكِ بمثله يا قمر ربنا يتقبل منا.

    ردحذف
  5. اية يا ست سلمى صفية مين هههههههههههه محنا كنا مع بعض مشقفناش صفية ههههههههههه والموقف بتاع روحى هتيلك نص كيلو سذاجة فظيعة كنت قولى القصة من وحى خيالك وخلاص بدل العريزة الى كتبتها دى انا عارفة دينا علاء

    ردحذف
  6. سلمى
    تأثرت بقصة صفية وايمانها الشديد .
    لعل بحسن ظنها يدخلها فعلاً الله الجنه وتتنعم بما تشتهي .
    اللهم اجعلنا من الاصفياء الانقياء .
    تقبلي مروري
    محمد البنا

    ردحذف
  7. ايه يا حجة دينا مفيش رقه بعد كدا،ما هى ماكنتش من أصدقائنا أنا قلت زميله يا أم ميار شكل ميار جابتلك زهيمر بدري بدري وأنتِ لسه فى عز شبابك، مش فاكره صفيه ورشا وهبه البنات اللى كانوا من التيار الاسلامي،ما أنا كنت بتحايل عليكم نصاحبهم، يلا بقى أيام

    ردحذف
  8. محمد البنا: اللهم آآآآمين، ربنا يرزقنا جميعا اليقين والرضا، جزاك الله خيرااا

    ردحذف
  9. السلام عليكم:
    قصة مؤثرة و طريقة سرد عفوية و جميلة.
    منذ أيام حكي لي زميل عن قصة طفلة في قطاع غزة لاحظوا أن حقيبتها المدرسية تكون فارغة في الصباح، و عند انتهاء اليوم الدراسي يجدونها تخرج بها المدرسة ممتلئة، عندما لاحظ المشرفون تكرار ذلك قرروا تفتيش حقيبة الطفلة قبل انصرافها من المدرسة فوجدوا بها كسرات خبز تقوم الطفلة بتجميعها بعد أن ينتهي الطلبة من تناول وجباتهم لاطعام أسرتها المكونة من خمسة أطفال آخرون و الأم، بعد أن استشهد الأب.
    تساءلت في نفسي، و أنا أعلم أن في مصر حالات مشابهة: من أين، و كيف أتي أصحاب المليارات (المليار 1000 مليون) بأموالهم في مجتمعات كهذه؟ و ماذا يفعلون بتلك الأموال الآن؟ و ماذا سيفعلون بها في المستقبل؟
    في الغرب (الغير مسلمين) يكون معروف للجميع المصادر التي جمع بها الأثرياء أموالهم، و تتم محاسبة من جمع أمواله بطريقة غير مشروعة، و كثير من الأثرياء الذين جمعوا ملياراتهم بطرق مشروعة وفقا للقوانين هناك فانهم يتبرعون بمعظمها أثناء حياتهم للمؤسسات الخيرية، و الأمثلة كثيرة علي ذلك، حيث يصبح الهدف من المال اسعاد الآخرين، و ليس سلبه من الناس بدون وجه حق و امتصاص دماء الغلابة لاكتنازه، و مضاعفته هو الهدف.
    حازم

    ردحذف
  10. اللهم أملء قلوبنا رضا وقناعة ويقين لا يتزحزح أبدا...

    ردحذف
  11. السلام عليكم
    قصة جميلة ومؤثرة ياسلمى ربنا يبارك فيك
    ياريت نكون مثل صفية وان لا نحزن على شئ لا نستطيع الحصول عليه فى الدنيا...فالأخرة خير وأبقى
    وما الحيوة الدنيا الا متاع الغرور.

    ردحذف
  12. الأخ الفاضل حازم وعليك السلام ورحمة الله وبركاته
    شكرااا ليكِ، قصة الطفله مؤثره جدااا وجعت قلبى بجد، واقع مؤلم جدااااا

    ردحذف
  13. أم عبد الرحمن: اللهم آآآمين، الموضوع دا محتاج مجاهدة نفس مش سهله بس ربنا يعينا عليها،

    ردحذف
  14. يااااااااااه

    فكرتيني بواحد صاحبي كان من نفس النوعية الجميلة دى
    وصاحبي دة علي فكرة اثر في حياتي بشكل ايجابي مكنتش اتخيل ان ممكن ابقي كدة

    ربنا يكرمه بجد


    تحياتي علي التدوينة الجميلة

    ردحذف
  15. هيثم، أجمل شيء أن الأشخاص اللى بيأثروا فى حياتنا مش لازم نعيش معاهم كتير ممكن ساعة واحده يعمل موقف يغير حياتنا، أن ربنا يرزقنا بالناس دول فى طرقنا بعتيرها نعمة كبيرة جدااا الحمد لله عليها

    ردحذف

شاركني خاطرتك...